అక్షర ఆయుధం న్యూస్ నవంబరు 1 రిపోర్టర్ శివలింగం వేములవాడ రాజన్న సిరిసిల్ల జిల్లా దేశంలో ప్రజాస్వామ్య పరిరక్షణే ధ్యేయంగా, అక్రమాల నిరోధమే లక్ష్యంగా ఢిల్లీలోని చారిత్రాత్మక రామ్‌లీలా మైదాన్‌లో ఇండియా కూటమి ఆధ్వర్యంలో ఆదివారం నిర్వహించిన ‘ఓట్ బచావో, దేశ్ బచావో’ భారీ ర్యాలీకి వేములవాడ నియోజకవర్గం నుంచి కాంగ్రెస్ నాయకులు బ్రహ్మరథం పట్టారు. వేములవాడ ఎమ్మెల్యే, తెలంగాణ రాష్ట్ర ప్రభుత్వ విప్ ఆది శ్రీనివాస్ నేతృత్వంలో వేములవాడ కాంగ్రెస్ బృందం ఈ నిరసన కార్యక్రమంలో అత్యంత ఉత్సాహంగా పాలుపంచుకుంది. ఇందులో భాగంగా వేములవాడ మున్సిపల్ చైర్మన్ పుల్కం రాజు ,స్థానిక మున్సిపల్ కౌన్సిలర్లు, పార్టీ ముఖ్య నాయకులతో కలిసి ఢిల్లీలోని తెలంగాణ భవన్ నుంచి రామ్‌లీలా మైదానం వరకు భారీ ప్రదర్శనగా బయలుదేరారు. జాతీయ స్థాయిలో చేపట్టిన ఈ పోరాటంలో వేములవాడ ప్రజాప్రతినిధులు, కాంగ్రెస్ శ్రేణులు చురుగ్గా పాల్గొని తమ నిరసన గళాన్ని వినిపించారు. ఈ సందర్భంగా వేములవాడ మున్సిపల్ చైర్మన్ పుల్కం రాజు మాట్లాడుతూ.. దేశంలో ఓట్ల చోరీ యథేచ్ఛగా జరుగుతోందని, ప్రజాస్వామ్యాన్ని పరిరక్షించుకోవడానికే ఇండియా కూటమి ఆధ్వర్యంలో ఈ ర్యాలీని నిర్వహిస్తున్నామని అన్నారు. రాజ్యాంగ బద్ధంగా నడవాల్సిన వ్యవస్థలను కాపాడుకోవాల్సిన బాధ్యత ప్రతి ఒక్కరిపై ఉందన్నారు. ఈ క్రమంలోనే కేంద్ర ఎన్నికల ప్రధాన కమిషనర్ (సీఈసీ) జ్ఞానేశ్ కుమార్ తన పదవికి తక్షణమే రాజీనామా చేయాలని గట్టిగా డిమాండ్ చేశారు. అంతేకాకుండా, సీఈసీ నియామకం, రక్షణకు సంబంధించి 2023లో తీసుకొచ్చిన వివాదాస్పద చట్టాన్ని వెంటనే రద్దు చేయాలని పుల్కం రాజు కోరారు. ఓటరు జాబితాల సవరణ ప్రక్రియ (సర్ – ) పేరుతో అనేక చోట్ల అక్రమాలు జరుగుతున్నాయని విమర్శించారు. అందుకే ఈ సర్ ప్రక్రియను తక్షణమే నిలిపివేసి, నిబంధనలకు విరుద్ధంగా తొలగించిన అర్హులైన ఓటర్ల పేర్లను తిరిగి జాబితాలో చేర్చాలని స్పష్టం చేశారు. ఎన్నికల వ్యవస్థపై ప్రజల్లో పూర్తి విశ్వసనీయత కలగాలంటే రాబోయే రోజుల్లో దేశంలో జరిగే అన్ని రకాల ఎన్నికలను ఈవీఎంలకు బదులుగా బ్యాలట్ పేపర్లతోనే నిర్వహించాలని ఆయన డిమాండ్ చేశారు. ఢిల్లీలోని తెలంగాణ భవన్ ప్రాంగణం నుంచి ప్రారంభమై రామ్‌లీలా మైదానం వరకు అత్యంత ఉత్సాహభరితమైన వాతావరణంలో సాగిన ఈ నిరసన ర్యాలీలో వేములవాడ మున్సిపల్ కౌన్సిలర్లు, కాంగ్రెస్ పార్టీ వివిధ విభాగాల ప్రతినిధులు, నాయకులు మరియు కార్యకర్తలు పెద్ద సంఖ్యలో పాల్గొని మద్దతు తెలిపారు.
