శిరీష హత్యకు ప్రభుత్వమే బాధ్యత వహించాలి.. మహిళలకు రక్షణ ఎక్కడ?

సింగరేణి, సెప్టెంబర్ 2(అక్షర ఆయుధం న్యూస్): ఆదివాసీ గిరిజన నర్సింగ్ విద్యార్థిని ఉకే శిరీషపై జరిగిన అత్యాచారం, హత్య ఘటనపై ఐద్వా తీవ్ర ఆగ్రహం వ్యక్తం చేసింది. మహిళలపై నేరాలు పెరుగుతున్న నేపథ్యంలో మహిళలకు రక్షణ కల్పించడంలో ప్రభుత్వ యంత్రాంగం విఫలమైందని ఐద్వా వైరా డివిజన్ అధ్యక్షురాలు కొండబోయిన ఉమావతి విమర్శించారు. శిరీషను అత్యాచారం చేసి హత్య చేసిన నిందితుడిని ఎలాంటి జాప్యం లేకుండా గుర్తించి, చట్టపరంగా కఠినంగా శిక్షించాలని ఆమె డిమాండ్ చేశారు.బుధవారం కారేపల్లిలో సూరపాక ధనమ్మ అధ్యక్షతన నిర్వహించిన సమావేశంలో ఉమావతి మాట్లాడుతూ.. మహేశ్వరం నియోజకవర్గంలోని తుక్కుగూడ ప్రాంతంలో ఉన్న ప్రైమ్ మల్టీ సూపర్ స్పెషాలిటీ హాస్పిటల్‌లో నర్సుగా పనిచేస్తున్న శిరీష తన గదిలో నిద్రిస్తున్న సమయంలో ఈ దారుణ ఘటనకు గురైందని తెలిపారు.మహిళల భద్రతపై ప్రభుత్వ హామీలు ప్రకటనలకే పరిమితమవుతున్నాయని, వాస్తవ పరిస్థితుల్లో మహిళలకు రక్షణ కల్పించడంలో పాలకులు విఫలమవుతున్నారని ఉమావతి మండిపడ్డారు. మహిళలపై అత్యాచారాలు, హత్యలు పునరావృతం కాకుండా నేరాల నియంత్రణకు పటిష్ఠ చర్యలు తీసుకోవాలని కోరారు.మహిళా రక్షణ చట్టాలను కఠినంగా అమలు చేయడంతో పాటు నిందితులను వేగంగా గుర్తించి, కేసు దర్యాప్తును నిష్పక్షపాతంగా పూర్తి చేసి, చట్టం ప్రకారం కఠిన శిక్ష పడేలా చర్యలు తీసుకోవాలని డిమాండ్ చేశారు. నేరస్థులకు చట్టం భయం కలిగేలా పోలీసు, న్యాయ వ్యవస్థలు సమర్థవంతంగా పనిచేయాలని అన్నారు.శిరీష కుటుంబం తీవ్ర విషాదంలో ఉన్నందున ప్రభుత్వం తక్షణమే స్పందించి కుటుంబానికి అండగా నిలవాలని ఉమావతి కోరారు. బాధిత కుటుంబానికి తగిన ఆర్థిక సహాయం అందించడంతో పాటు, కుటుంబ సభ్యులకు అవసరమైన ప్రభుత్వ సహకారం అందించి వారి భవిష్యత్తుకు భరోసా కల్పించాలని డిమాండ్ చేశారు.మహిళలు, యువతులు, ముఖ్యంగా ఉద్యోగాల కోసం ఇతర ప్రాంతాలకు వెళ్లే మహిళలకు సురక్షిత వాతావరణం కల్పించడం ప్రభుత్వ బాధ్యత అని ఆమె అన్నారు. ఇలాంటి ఘటనలు పునరావృతం కాకుండా పనిచేసే ప్రదేశాలు, హాస్టళ్లు, అద్దె గదులు తదితర ప్రాంతాల్లో భద్రతా ప్రమాణాలను కఠినతరం చేయాలని సూచించారు.ఈ సమావేశంలో కేశగాని నీలిమ, చల్ల మల్లమ్మ, బానోతు సరోజిని, సోమందుల నాగమణి, పాయం వరలక్ష్మి, వజా లక్ష్మి, అజ్మేర జ్యోతి, పోతర్ల సునీత, బొమ్మల ధనమ్మ, సరూపరాణి, రమాదేవి తదితరులు పాల్గొన్నారు.